Jens Mortan Rasmussen, Lív Egilsdóttir Olsen og Heidi á Lakjuni vanta á myndini.
Herfyri hevði Meginfelag Føroyskra Studenta aðalfund. Tíggju fólk vórðu vald í ráðið, fimm teirra nývald, og nýggjur formaður í MFS er Regin Berg. Aðalfundurin heitti á ráðið um serliga at arbeiða við nøkrum viðurskiftum, sum einamest hava týdning fyri lesandi í Føroyum.
Áheitan á ráðið og broyting í reglugerðini
Eitt uppskot varð sent ráðnum um at broyta reglugerðina, soleiðis at útlendingar, sum lesa í Føroyum, kunnu verða limir í MFS. Aðalfundurin samtykti einmælt hesa broyting, av tí at tað er ein natúrlig uppgáva hjá MFS at stuðla øllum lesandi í Føroyum.
Aðalfundurin heitti á ráðið at arbeiða fyri: At studningurin til føroysk lesandi hækkar, verður prístalsviðgjørdur, og at ein fær studning í 12 mánaðir heldur enn 11. Hetta av tí einføldu orsøk, at studningurin lesandi í Føroyum fáa, er alt ov lítil til at ein kann liva av studninginum. Serliga tá ein hugsar um avmarkaðu bústaðarmøguleikarnar og kostnaðarstøðið í Føroyum, er hetta ein trupulleiki hjá lesandi. Hóast fleiri vilja lesa í Føroyum, og sera nógv lesandi halda, at Føroyar eru besta staðið at vera sosialt og fyri framtíðar møguleikar, so ger tað fíggjarliga, at nógv noyðast at fara av landinum. Hægri lestur er eitt fulltíðarstarv, og allar kanningar vísa, at tað eru tey fæstu, sum kunnu arbeiða serliga nógv afturat lestrinum, uttan so at tað gongur útyvir prógvið.
Harumframt vil aðalfundurin, at MFS skal arbeiða fyri, at ÚSUN ikki verður umlagt til lán, eins og at rentan á lestrarlánum skal lækkast. At enda heitti aðalfundurin á ráðið um at skipa fyri eini árligari kanning av liviumstøðunum hjá lesandi í Føroyum.
Ráðið
Fýra teirra, sum vóru við í gamla ráðnum, stillaðu ikki upp aftur. Hesi vóru Teitur Vágadal, Martin Mohr Olsen, Hallur av Rana og Maria Ziskason Nesá. Vit vilja fegin takka teimum fyri arbeiðið tey hava gjørt farnu tíðina. Serliga vilja vit takka Martini og Teiti, sum hava verið virknir í MFS í fleiri ár, og hesa tíðina hava verið millum teir mest virknu og arbeiðssomu í ráðnum.
Nýggja ráðið sær soleiðis út:
Birita í Dali, Universitetet i Tromsø, afturvald
Eirikur Sanderson, Copenhagen Business School, nývaldur
Guðrið Poulsen, Fróðskaparsetur Føroya, nývald
Heidi á Lakjuni, Roskilde Universitet, nývald
Jens Mortan Rasmussen, Fróðskaparsetur Føroya, afturvaldur
Lív Egilsdóttir Olsen, Metropol, nývald
Marin Helena Hentze, Aalborg Universitet, afturvald
Oda Strøm, Københavns Universitet, nývald
Regin Berg, Fróðskaparsetur Føroya, afturvaldur
Turid Christophersen, Fróðskaparsetur Føroya, afturvald
Regin Berg gjørdist formaður, Birita í Dali næstforkvinna, Marin Helena Hentze kassameistari og Oda Strøm skrivari.